Ansprache von Johann Frank, Westerländer Biike 2001

Min lef Sölring lönsliren en freemern,
Üs jerst di Büki-dechting fan Jens Murgard:

Flämi äp - Büki fan Söl!
Sa tjen wü dit jöl
Tö iaren fan Söl,
Üs gröötnis fan strör
Fan lönj tö lönj !

Helig ual jöl, üüs Büki fan Söl,
Brenn Dü en ljucht, üs Dü altert heerst dön
Dat wü uk teenk, alhur wü uk sen:
Söl es üüs ain, diar leeng wü dach hen!
Warel es gurt, üüs tiren sen kuurt,
Let üüs da lööwi fuarfaarens uurt:
Sölring üüs uurt, en Sölring üüs wüs
Skin'üüs döör winj en weder en düs
Lucht Dü üüs Büki, warem en klaar,
Lucht üüs üt tiren sa junk en sa swaar!
Let üüs da lööwi, glemen üs jöl,
Oler forgung ske't Büki fan Söl!

Lef lönsliren! Lef frinjer! Lef freemern!

Juu altermaal grööt ik tö di jerst Büki ön dös jaardüüsend! Nü stuun wü wederjir bi üüs Büki, früügi üüs aur ditjöl brükdom, diar üüs fan üüs fuarfaaren aurkemen es.

Jer wiar't di tir fuar di waltängers, om klaar tö wüs fuar jam ofais, diar fuar en ker jam dit lek wüs kür - en fuar maning fanjam di leest rais wiar. Hur maning fanjam sen omkemen üp rais, üp is - en fuar kraankhair! En fuar di tir fan di walfang haa üüs fuarfaaren dit Bükin fiirit, om ja di junk wuntertir lür wiar. di daagen leenger waar - en ja wust, di uurs kumt me lefin en bloomin.

Üüs sörigen sen deling wat üders - wü sörige üüs om üüs ailön, dit fan forskelig siren ön gifaar es. Üs jerst: dit weeter tiarit muar en muar bi üüs weesterkant - wü weet, di weeter-spail stügt - litjem , man seeker. Sa rocht weet nemen, wat maakit uur skel, om üüs ailön seeker tö maaki. En uk fan di mensken kumt gifaar: üüs ailön uur aurlöpen fan mensken me j am streewin j ir j il tö maaki. Me sörigen se ik wat sa ön üüs dünemer en bi strönj fuar gileegenhairen fuar wiartschaften en üderjil-forwärifen tö-leten uur. En lik sa, se ik gifaar fan nü sport-aarten, danja bi strönj bidrüf wel en uk fan di skeps-bidrüf se ik gifaar, - wan diar nönt dön uur - ken wü j it wat bilefi!

Üs jerst ken wü fan lek sü: al weder haa wü lek her - weder jens haa ja en skep of fangtjer'rjir üp strönj gingen es. En nü sjocht't uk üs wanja diar boven iinsen her, dat wü di "Oceanic" brük. Wan'm höm bluat diarüp forlet kür!

En nü stuun wü jir bi üüs Büki jöl en da falt üüs ün, dat wü Sölring liren sen - man wat dö wü diarfuar? Wat es fan üüs Sölring aart en wüs blefen? Wü Sölring liren stuun bisir-fan en luki tö - let üüs dit lün üt di hun'n nem - en sü nönt diartö. Ken dit rocht wüs? Ik sii: sa ken't ek fiider gung!

Wü Sölring sen altö litjem! Hat es aaler-hoochst tir, dat Sölring liren jens tö uurt kum jir ön üüs stadt en aural üp üs ailön. Liren,'aurlüjens, hoken I fuarjuu saak strir let wel - dänen, dän nü dit süen haa sen wes ek dänen wat I brük!

En dianne kum ik tö wat, wat mi plaagit: nü stuun ik sent 11 jaaren jir en snaki tö juu en sa hol' her ik dat'r hoken jungers käm - en min baantji jir aurnemt. Es diar da nemen, di dit wil?

lk uur miarn nügen-en-söstig j aaren ual en üs ik junger wiar, her ik dit gifööl sa ual liren skül't mür hual - en jam töbeek hual. Hurdeling es dit - es diar nemen, diar höm hol'di mür forbren wel? Wan diar hoken wiar, - höör of höm - wil ik hol' help en tö sir stmm - wat ik heln kür, wil ik hol dö!

Dat I dit rocht forstuun - ik wel't ek äpdö, fuar Söl tö strir,- man ik meen, ön min ialer skül'm lever junger liren fuar-treer let! Ik weet noch, I junger liren, I haa me juu aarber en familü noch om di uaren - man teenk jens diarom: hat gair om juu tökumend tiren! I skel me dit wat nü en ön di naist j aaren lapt, lefi ! Fn ek bluat I - uk juu jungen skel me dit lefi!

Hat jeft uk leecht ön't junken. Ön dös jaar heer di pröst Ernst Martin Dahl sin früsk soongbok fuarstelt - en ön Muasem heer hi di prötjü üp Sölring hölen. En dit es en mensk, diar üp Feer äpwuksit es üs seen fan en pröst, diar dütsk snakit, man hi heer me sin makers Fering lürt en üs wüksen mensk ön Kiel Früsk studairit - en diarbi uk Sölring. En san mensk kumt jir aur üp üüs ailön en snakit ön üüs spraak! Wat jert diartö! En hurdeling es't me juu? Wat deer'st Dü - en Dü - fuar Din mooderspraak?

Üs ark jaar ber ik juu altermaal diarom : snaki Sölring me juu jungen en snaki Sölring me-ark-üder! Wan wü üüs spraak ek ärk dai brük, wan't möögelk es - da uur't aurüten - en I haa't ön di hun'n, I - dän mi forstuun, dän me mi Sölring snaki - wüs sa gur, let sok ek döör-gung, wan'r hoken es, diar Söli ing snakit - da snaki me höm Sölring! Bliid sen ik aur dit, dat önjungensguarter Sölring lürt uur, dit mai me di tir weder aurüten uur, man san betgen bleft mesken diarfan aur. Di jungen lür tömenst, dat j Sölring jungen sen, en nün freemern.

Biiki heer uk troost me höm - sent tau muun'n kumt di sen al wat hoocher, di daagen uur leenger - hat uur weder! En dös junk tir heer wat fuar höm: oler sen di klöören fan dit taak ön di märk sa dailk üs ön di tir, hur di sen sen sa lüch staant. En nü ken wü bi heefjit di ruu gineet - di ön di somer müst forleesen gair! Ek lung hen, da wuksit weder alis en da uur't weder brokit.

Man, bi al'dit mut'm ek aurüt, wat di somer üüs fuar fortröt me-bringt. Gur, - fuar dit jil haa wü noch brük - man, skel't alis sa aur di maaten gurtem wüs? Es dit nöörig, dat üüs straaten en üüs promenade tö freet- en sop-mülen forkum? Es dit di lefins-aart fan üüs tir - en es dit üüs aart en wüs? Wes, 'm skel me di tiren gung, man ik lüf, dit gair aaft tö fiir! Wü skül üüs wes jens üp bisen, hur wü fan kum - en aurlü, hurhen wü gung! Wan dit sa fiider gair, da uur üüs ailön techt begt en wü Sölring forswin twesk al di freemern - wan dit ek al sa es!

Alerweegen uur begt üs ek rocht klook, diar uur altert fan di terper snakit - bi ü ön Weesterlön es't ek en stek beeter. Altert uurjamert, di aurnachtings-talen fan baadeliren ging töbeek - en likert uur ärk jaar weder muar apertment-hüsing begt. Ik lüf di statistik al'lung ek muar - diar es di würem ben! Diarüp wel ik ek fiider iingung man ik haa ek bluat nün gur gifööl diarbi!

Hat es en skandaal, dat sa maning Sölring fän't ailön gung, omja teenk, dat fuarjam jir nün plaats muar es. Wan üüs fuarfaaren dit wust, watjir ön üüs tir sa pasairit, ik lüf, ja wil jam ön di greefen omdrai! Nemen törcht mi fortel, hur swaar dir es jir üp ailön tö wat ains tö kum, man, ik teenk, m'maast dit ek sa waker äpdö!

Me arkjen, diar fan't ailön gair en ek weder kumt, gair en stek Söl forleesen - aliksa, üs me arkjen, diar sin mooderspraak aurüt, of ek nutsit - en stek fan üüs Sölring aart en wüs forleesen es! Üp di tünst Februar wiar ik ön Kairem, diar her hok Sölring jung wi.ifhaur me di Sölring jungensguarter en eedermedai maakit me bastlin, sjungen en daansin - dit heer mi gifeelen - wat wiar dit noch gur, wan diar jit üder Initativen braacht uur kür. Di jungen wiar rochtsa bäing liren en gurt gifaal - di tiren, hur'm höm skaamit heer fuar sin ual spraak sen dach lung fuarbi! En diar sen sa maning, dän ek jir beren sen, en üüs spraak lür - weer I dit lüf of ek, dit sen maning! En dän teef bluat diarüp, dat'm Sölring me jam snakit!

Sölring liren, teenk om, hurfan I kum - en teenk om di tö-kumend tiren - biteenk, wan I ek üüs aart en wüs biwaari, da deer't nemen - en da es't forleesen - teenk om, wat ik juu ärkjaar weder sii!

Sa - I Sölring liren - ik wel juu ek leenger plaagi - ik wenski juu altermaal en gur formaak tö Büki en uk tö Pidersdai - en da let üüs töhop "Üüs Sölring Lön" sjung!