Ansprache von Erk-Uwe Schrahé, Rantumer Biike 2002

Gud Inj altermaal.

Lef Sölring Lönsliren en lef Frinjer fan üüs dailk Ailön.

En hartelk welkemen tö üüs Biiki. Ik wel nü man en bet suutji snaki, dat di jen en di üder dit mesken beeter forstuun ken. Üp Plat wel ik sii: För di wat Plat snakt: Ik snak nu een beten suutje, denn köönt ji uns Sölring villicht beeter verstahn!

Wan et uk man en Hunfol Liren sen, wat üüs Spraak forstuun ken, es di Hun jit litjer fuar dänen wat dit snaki ken. Dach wan di Liren ek sa lai wair, üüs Spraak tö liir'n, wiart wes üders. Man üp di üder Sir sjocht em dach, dat dänen wat niin Sölring, niin friisk, snaki, jam dach, bi sa'n Dai üs deling, wes di Taachten kum, hur ja itüüs sen.

Man dit sii dänen uk hol wan ja önerwai sen, üp Fastlön - jaa - da prötji ja diarme, dat ja fan Söl kum en sii dat ja Sölring sen, man di ain Spraak fan jaar Ailön dit ken of ken ja ek.

Uur bi sa'n Biiki, jir, ek arkmol weder en Teeken seet, dat wü wan't on üüs Brükdom gair, likert, töhop stuun, of em nü Sölring ken of ek. Uurter aur dit, hurom wü jir töhop kum, tö Biiki, heer üüs Büürfööger jaa al sair en dit nem ik ön weet uk ark en jen, üders wiar hi dach ek jir.

Ik wel nü tö Jen kum, wan ik uk jit fuul muar sii maat, dach ik finj dit ek gur, wan Liren diar twesken Pjati, sa üs nü, aurdat ja jam sii: ik ken't jaa dach ek forstuun.

Lef Lönsliren, I, wat jit en Uurt Sölring snaki, dö des Uurter dach förter. En tö dänen wat dit forstuun ken, man ek snaki ken, jaa da liir dit snakin dach. Da bitenk hat jeft en Spreekuurt wat sair: 'Stereft en Spraak - Stereft dit Fulk! En dit wel wü dach ek, of??

Ik wenski juu injung jit rocht fuul Formaak en sii:
Biiki fan Söl, skiin aur üüs Lön, sa üs dü altert heest dönn!

Fuul Dank!