Ansprache von Jan Ossenbrüggen, Keitumer Biike 2006

Lef Kairemböör, lef Sölring Liren, lef Liren tö Gast!

Wü raaki üüs deling tö Biiki 2006.

Gröötnisen tö Biiki en Pidersdai sen me Seekerhair niin Önspraaken, hur em Wishair for diilet of diaraur skandeeret, wat ön di leest Muunen sa alis forkiirt löpen es. Wü skel üüs – üs ön ual Tiren – tö Eenighair, Rocht en Friihair bikeen en fuar di Jungen ön Wai weegi, hurhen di Tökumst föört. Man wat haa wü ön di forleer´n Jaar fuar üüs Terp skafet? Fan Eenighair es diar ek sa fuul tö se´n, en Rocht en Friihair uur fan üdern bistemet: Aaftenoch! Di miist Kairemböör teenk jam fan „Dorfentwicklung“ wat üders. Suurt, ruar, green of güül Partei-Oogen luki ek langsen di jen en salev Wai. Ja skafi me des „Farbenlehre“ ek jüst Fortruuen. Ali Bidiiligten weet: Diarbi sen uk deling jit jen en jen glik tau. En eeder muar skül wü gaar ek leeng. Dit maast dach tö skafin wiis.

Hat es noch legitim, Hotelprojekte sön´er Tsunami-Aangst en ön See-Bröch hen tö di Doggerbank üs Vision üp Popiir tö maalin. Man ken di litj Plak Öört, wat em Söl neemt, sok Visionen, sok Dimensionen uk takelt fo? Hur bleft üüs Kapital Natuur me sin Depot Ruu? Me Sölring Aart en Wiis, rüm Hart, klaar Kiming heer dit nönt tö dön. Di Bigrip uur üders düütet. Di Ünseekrehair fan Tökumst driiw üüs Jungen hen tö Fastlön, Hööpning üp Tökumst jir üp di Ailön ken em auriit, wan´t Freemer´n weder en weder leket, Hiir en Dünemer, Stööwen en kiming me jaar gurt Fet tö Gaagen fan di ain Jilbok tö nönt maaki. Sörigen ken bluat üt di Wai rümet uur, sa lung Sölring Liren jam eenig sen. En diar es di Bispöl Fusion. Wü ken diarfan ütgung, dat ark Gimiindi weder höör ain Sop kööki wel. Di Wai skel dit Maal wiis! Lef Sölring Lönslir, hoken ek weet, hurfan hi kumt, ken uk ek weet, hurhen hi gair. Wat wel malööri? Lön en Krais haa jen Dai di Snüt fol en biweegi di Tüm fan boowen hen tö öner´n. Me Rochten, aur ja, dit es bikeent, allung di saneemt Wuksdem üp Söl Stöt.

En ön Hüsem en Kiel teel Argumente. Des Argumente jit jen Dai Damp en Drok – en wan´s jam diar boowen eenig sen, dö ja di Duiwel en nem di Damp üt di Serel. En da jeft dit „nii“ sölring Staatjis. Ja fortel fan „ual“ Tiren, hur di Sölring hok Freemer´n me senerlig Taachten om den Tir me ön Gratpot dööpet haa. Lef Liren, hoken ek weet, hurfan hi kumt, ken uk ek weet, hurhen hi gair. Man likers, ön fründlig Forloop fan üüs Biki en Pidersdai wensket Juu Di „Ortsbeirat Kairem“ üp Söl!

Fuul Dank fuar Bisjuk!
En nü let üüs sjung: Üüs Sölring Lön, Dü best üüs helig ...