Ansprache von Maike Hauschildt , Hörnumer Biike 2008

Lef Sölring, lef Hörnum Bör en Frinjer

Dit Jaar ging weder aaltert tö waker om , wat skül ek ales paseri ön des 365 Daagen, wü wül beder Mensken uur, muar Tir fuar üüs en di Ain haa, di Warel skul en gur Itüüs fuar ali Mensken wiis. Man wat es? Hat uur jit langsen skööten, muurdigt, löögin en wech lukert.

I teenk nö wes ön Löner fiir wech fan üüs, naan ik luki jir üp üüs liit Sönstak. Skööten uur jir wes ek üp iipen Straat, man hat es al lung ek muar sa söner jir , wü skel muar en muar bang wiis dat üüs Jungen seeker apwuksi ken.. Lung fuar bi di Tir hur em teenk kö me Drogen en Gewalt dit es fiir wech fan üüs. En hoken jit höpet om Help fan Boowen,fiar me jens töhiiren „Help di salev, Niin Jil, wat seetst Dü uk Jungen iin ön des Warel. Niin Jil dat üüs Jungen sün en me gur Skuulweeten apwuksi ken.

Hat wiar tö Fortwiiwlin, wan diar me jens wat paseret, üs lest Sendai. Mensken kam töhopen weeget jaar Aarber , weeget Waier, Mögelkhiarn me sin Leewen wat töbigenen, ön Gimiinskep wat tö bigenen. Jit beder es hat waar jam töhopslüten, sa dat em me jen Stem fuar muar Help iinstuun ken. Des Wai skel wü ön sa fuuli Saaken iin slaa, wü Sölring skul me en stark Stem snaki en ek bluat ark sin ain Rosin üt dit Pötjigrat plooki. Wü ali skel luki dat wü üüs Ailön –üüs Warel ek föörter skoori. Jüst jir ön Hörnem skuul ark en Teeken set, bihol wat dü heest en forbrüg ek muar üs nöörig es. Ik men set di me Gurt Energie fuar di Gimiinskep iin, man brüg mener Energie ,dat üüs Warel bistuun bliiv ken. Maaki ofters jens juu Leechter üt , köör ek fuar ark Skeet me Wain tö Weesterlön. Aurlii en dö wat fuar Di, fuar Me en di hiili Warel. Ölers staant üüs, jüst jir ön Hörnem di Weeter bal bitö Hals. Maaki dit en sjung diar tö üp üüs gur ual Spraak, da giart gliks wat leechter en dü weest hurfuar dü dit deest.

Sa let üüs ali guurtem sjung: Üüs Sölring Lön…

Biiki Biiki-Soong
Fuaraal' ems Wiis
jit itüüs,
Hur omHoog
Söl'ring jir stuun
Truu töhop
Üs wü dit uun.

Biiki fan Söl',
Helig ual' Jöl'
Aal'ems Wüs
Bliiv jir itüüs !
Iinighair
Uuni bi üüs!

Letüüs da sjung
01' er forgung
Skel üp Söl',
Friihair en Rocht
ManelkSen,
Diar höm ek bocht.

Biiki fan Söl'
Helig ual' Jöl'
Flami äp!
Skiin aur üüs Lön'
Sa üsdü
Altert heest dön!

(C. P. Christiansen)