Ansprache von Inge Gieppner-Carstensen, Tinnumer Biike 2011

Lef Sölring Lönslir, lef Frinjer, lef Gasten,

wü skriif deling di 21. Febr. 2011 en weder bren aliwegen jir üp Söl, üp di üder Ailönen, üp’t nai Fastlön di Biiki, sa üs dit sent fuul hönert Jaaren Brük es. En weder haa wü üüs jir töhopfünen, uk en Brük, wat langsen jit lewet uur. Wat en Lek!

Fuul ual Brükdom es aur di Jaaren forleesen gingen, uk dit Biikibrenen heer sin Bedüding foranert. Wü ber ek muar om en gur Baricht, wü driif ek di Wunter üt, wü sii des Dai ek Farwel tö Seelir. Man wü finj üüs töhop, om ual Brükdom tö pleegin en tö weegin, dat wü töhopstuun ken en wel. Töhoptöstuunen, dit es eeder min Miining deling muar üs nöörig. Hat jeft tö Tir fuul Üniinighair jir üp Söl, Fortröt mearküder, önerarküder. En dit es ek gur.

Fuar trii Jaar heer di gurter Diil fan di Mensken sik üp Söl fuar di Fusion ütspreeken, en sa kam dit tö di Gurtgemiindi Söl. Man dit es jit lung ek ön ark Haur bi arkenjen önkemen. Diar es Strir önerarküder, diar uur keekelt töögenarküder en fan en gur Me-arküder sen wü jit rocht sa fiir.

En diarfuar maat ik mi wenski, dat wü jir bi dit Biikijöl üüs diarüp bidarigi, wat üüs Fuarfaarn üs fuarlewet haa. Töhoptöstuunen ön gur en mener gur Tiren, forliki me arküder, üparküder tögung, om töhop fuar Söl en fuar di Mensken, diar jir lewi, dit beest tö maakin.

-Bi arküder, -me arküder, - fuar arküder –

Wan wü dit altermal forsjuk, da, teenk ik, sen wü üp en gur Wai. Strir en Spiktaakel heer jit oler wat braacht. En danen, diar töögen di Fusion wiar, mut bigrip, dat et ek wiis ken, langsen jit diartöögen öntögungen.Wat wü brük, es Iinighair önerarküder, jest da sen wü stark. Üüs Fuarfaarn wiar uk ek langsen iinig me arküder, man ja wiar klok noch, aur ja wust,dat om bluat stark es, wan om töhophalt.

En diartö röp ik juu deling ap:

Hual ap me dit Striren, gung üp arküder tö, snaki me arküder en iinigi juu.

Da sen wü jir üp Söl üp en gur Wai. En sa grööt ik juu me üüs ual Sölring Biiki-Soong:
Biiki fan Söl, helig ual Jöl,
flami förterhen ap en skiin aur üüs Lön
sa üs dü altert heest dön.
Biiki fan Söl, helig ual Jöl,
Aalern’s Wiis, bliif jir itüüs,
Iinighair uuni bi üüs.

Let üüs dit töhop öngung me en
Rüm Hart en en klaar Kimming.

Fuul Dank!